ناوه‌ڕۆك
ناساندن
ئەندازیاریی پڕۆگرامسازی ئەو بەشەی ئەندازیارییە کە بەرپرسە لە دیزاینکردن و بەرەو پێشبردنی سیستەم و پڕۆگرامەکان، مامەڵە دەکات لەگەڵ کۆمپیوتەر و ئینتەرنێت.
پڕۆگرامسازی بریتییە لە زنجیرە فەرمانێك کە دەدرێتە کۆمپیوتەر، ئەم فەرمانانە چەند کردارێکی گرنگن وەکوو پیشاندانی زانیاری و کۆگاکرنی داتاکان.
هەروەها ئەم بەشە لە پسپۆڕییەکانی ئای تییە (IT)، کە لەسەر بنچینەی کۆمەڵێك یاسا و ڕێسا دانراوە ئامانجیان دیزاینکردن و بەرەو پێشبردنی پڕۆگرامسازی و ئەو پڕۆگرامانەن بە کوالێتییەکی باش، و دەستەبەرکردنی پێداویستییەکانی مرۆڤی ئەمڕۆ.
تایبەتمەندی و مەرجەکانی بوون بە ئەندازیاری پڕۆگرامسازی
- لێهاتوویی لە دیزاین و شیکارکردن.
- لێهاتوویی لە نوسینەوەی کۆد و شارەزایی لەو بوارەدا.
- پەیوەست بوون بە کاتەوە.
- توانایی لە بەرەوپێشبردنی سیستمە جیاوازەکان.
- جیاکاری بکات لە نێوان ئەندازیاریی و پڕۆگرامسازی.
- وردکار و کارامە بێت لە مامەڵەکردن لەگەڵ تەکنەلۆژیا.
- بەتوانا بێت لە زمانی ئینگلیزیدا، چونکە ئەم بەشە بڕێکی زۆر لە زاراوە تەکنیکییە ئینگلیزییەکان لە خۆدەگرێت و خوێندن لەم بەشە بە زمانی ئینگلیزییە.
- بەتوانا بێت لە بەرهەمهێنان و دیزاینکردنی پڕۆگرام و سیستەمەکان.
- کارامەیی هەبێت لە STEAM واتا لێهاتوویی لە زانست و تەکنەلۆژیا، ئەندازیاریی و بیرکاری.
- توانای کارکردنی بە کۆمەڵی هەبێت.
- حەزی نوێگەری و داهێنانی هەبێت.
- گرنگیدان بە وردەکارییەکان.
- کارامە بێت لە ئاسانکردنەوەی بابەتە ئاڵۆز و قورسەکان.
- توانای بڕیاردان و بەڕێوەبردنی هەبێت.
- بە توانا بێت لە زمانە جیهانییەکانی پڕۆگرامسازی.
جیاوازی نێوان ئەندازیاریی پڕۆگرامسازی و ئەندازیاریی کۆمپیوتەر
هه‌ردوو بەشی ئەندازیاریی كۆمپیوته‌ر و پڕۆگرامسازی په‌یوه‌ندی به كۆمپیوته‌رەوە هه‌یه به‌ڵام جیاوازن، چونكه ئه‌ندازیاریی كۆمپیوته‌ر له ئامێری كۆمپیوته‌ر (واته به‌شه ڕه‌قه‌كه‌ی كه هاردوێره) ده‌كۆڵێته‌وه، ئەندازیاریی پڕۆگرامسازی له پڕۆگرامەکانی كۆمپیوته‌ر و وێبسایت و شتی تر (واته به‌شه نه‌رمه‌كه‌ی كه سۆفتوێره) ده‌كۆڵێته‌وه.
وانە سەرەکییەکانی ئەندازیاریی پڕۆگرامسازی
| کوردی | ئینگلیزی |
|---|---|
| داتاشراوەکان و تەواوکاری | Calculus |
| دیزاینکردن و شیکارکردنی سیستەمەکان | System Analysis and Design |
| تێستی سۆفتوێر | Software Tasting |
| بەڕێوەبردنی پڕۆژە تەکنەلۆژییەکان | IT project Management |
| داتا سترەکچەر | Data Structure |
| بنچینەی داتاکان | Data base |
| دیزاینکردن و شیکارکردنی ئەلگۆریزمەکان | Algorithms Design and Analysis |
| سیستەمە کارپێکەرەکان | Operation Systems |
| پڕۆگرامسازی ئینتەرنێت | Internet Programming |
| پڕۆگرامسازی بینراو | Visual Programming |
| بازرگانی ئەلیکترۆنی | E-commerce |
| بەڕێوەبردنی نموونە پڕۆگرامسازییەکان | Software Configuration Management |
| زیرەکی دەستکرد | Artificial Intelligence |
| مرۆڤ و کۆمپیوتەر | Human- Computer-Interaction |
| سیکوریتی زانیارییەکان | Information and Network Security |
- ئەم وانانە بە شێوازی تیۆری و کرداەکی دەخوێنرێت، لەگەڵ چەندین وانەی لاوەکی تریش.
- ماوەی خوێندن لەم بەشە چوار ساڵە و بە زمانی ئینگلیزییە.
- دەکرێت بڵێین ئەندازیاریی پڕۆگرامسازی تێکەڵەیەكە لە تەکنەلۆژیای زانیاری و زانستی کۆمپیوتەر و پسپۆڕییە ئەندازیارییەکان، بە ڕادەیەکی زۆر پەیوەستە بەو بوارانەوە.
لایەنە ئەرێنییەکانی خوێندنی بەشی ئەندازیاریی پڕۆگرامسازی
- بۆ بوون بە خاوەنی پڕۆژەی خۆت پێویستی بە سەرمایەی گەورە نییە.
- بڕی زیان کەمترە بەراورد بە قازانج و دەستکەوت.
- ئەندازیاری دەرچووی ئەم بەشە توانای جیاکاریی و ناسینەوەی پڕۆگرامەکان و سیستەمەکانی هەیە.
- ئەندازیاری دەرچوو زۆر بە ئاسانی توانای لێکۆڵینەوە و شیکارکردنی هەیە .
- بەهۆی ئەوەی ئیستا تەکنەلۆژیا لە زۆربەی بوارەکانی ژیاندا زاڵە، بۆیە بوار و هەلی کارکردن لەم بەشە زۆر فراوانە.
- بەدەستهێنانی داهات و مووچەیەکی بەرز.
- بوارەکانی کارکردن هەمەچەشن و فراوانە.
- ئەم پسپۆڕییە ئاسانترە بەراورد بە بەشە ئەندازیارییەکانی تر.
- شوێنی کارکردن سنوردار نییە و تەنها لە ئۆفیس و شوێنە داخراوەکان نییە، بەڵکو ئەندازیار لە هەر جێگەیەك بێت دەتوانێت کاری خۆی بە ئەنجام بگەیەنێت تەنها پێویستی بە لاپتۆپێك و هێڵی ئینتەرنێت هەیە.
لایەنە نەرێنییەکانی خوێندنی بەشی ئەندازیاریی پڕۆگرامسازی
- کارێکی وورد و ئاڵۆزە پێویستی بە ئاگایی زۆرە.
- کارکردن بۆ ماوەیەکی درێژ کە دەگاتە پتر لە 40 کاژێر لە هەفتەیەکدا دەبێتە هۆی ماندووبوون و بێزاری.
- دەبێت بە بەردەوامی کار لەسەر توانا و لێهاتووییەکانت بکەیت و بەرەویان پێ بدەیت.
- بەکارهێنان و کارکردن لە سەر لاپتۆپ و کۆمپیوتەر بە بەردەوامی کە دەبێتە هۆی ماندووبوون و زیانگەیاندن بە تەندروستی چاو و جەستەت.
- کارەکان تاڕادەیەك لەیەکدەچن و چەند خاڵێکی ورد جیایان دەکاتەوە.
گرنگترین زانکۆکانی هەرێم کە ئەم بەشەی تێدا دەخوێنرێت
- زانکۆی کۆیە
- زانکۆی سەڵاحەدین
- زانکۆی ئەمریکی لە سلێمانی
